- Detalles
No DOG do 23/06/2022 a EGAP publica a RESOLUCIÓN do 15 de xuño de 2022 pola que se convocan as actividades de formación continua para o persoal ao servizo da Administración xeral da Comunidade Autónoma de Galiza, das entidades públicas instrumentais do sector público autonómico e da Administración institucional.
O prazo de presentación de solicitudes será de dez días a partir do día seguinte ao da publicación desta resolución no DOG.
As solicitudes de participación nas actividades formativas só poderán realizarse mediante o formulario de matrícula telemática dispoñible no enderezo <https://egap.xunta.gal/matricula> desde as 8.00 horas da data de inicio do prazo de presentación de solicitudes e ata as 23.55 horas da data de finalización. As solicitudes entenderanse presentadas unha vez que se complete correctamente o proceso de matriculación.
O número máximo de cursos que se poden solicitar durante o prazo de presentación de solicitudes limítase a tres.
Os criterios selectivos que serán empregados son os sinalados con carácter xeral na Resolución da Escola Galega de Administración Pública do 4 de xaneiro de 2008 (DOG núm. 7, do 10 de xaneiro), sen prexuízo dos criterios específicos establecidos no epígrafe «persoal destinatario» de cada actividade formativa incluída no anexo II desta resolución.
Convocan 51 actividades de diversa índole e consellarías.
- Detalles
Recibimos convocatoria e documentación dunha proposta de modificación da RPT da consellería de Facenda e Administración Pública, que vai ser tratada nunha xuntanza o luns 27 de xuño.
Se queres dicirnos algo sobre este asunto, podes contactar coa CIG.
- Detalles
Na Comisión de Persoal do 21 de xuño aprobáronse as convocatorias dos proceses selectivos de A1-C1-C2-corpos xerais de acceso libre, e de C1-vixiantes de estradas por promoción interna.
As convocatorias de corpos xerais de A1 (descargar) e C1 (descargar), en grandes liñas:
- Non teñen promoción interna (si existe promoción separada da libre). A primeira reivindicación da CIG é poñer en marcha xa a negociación do seguinte concurso de traslados de corpos xerais e a promoción interna, para que así poidamos dar destino definitivo ás persoas que superen estes procesos.
- Existe nota de corte fixada nas bases para o primeiro exercicio. E inda que na negociación conseguimos que meteran corte tamén para o segundo, quedou fora A1. Non conseguimos ampliar o corte do primeiro exercicio.
- Para A1, non aceptaron substituír o exame de tema por outra opción como suposto práctico tipo test.
- Tampouco aceptaron substituír os temas por normas de dereito positivo no programa, e alternativamente elaborar manuais ou referencias bibliográficas.
- Algunha das convocatorias dividen un exercicio en dúas partes, pero cada unha delas con corte propio, co que en realidade son exercicios diferentes.
- Estas foron as votacións:
- A1: CIG en contra, CCOO a favor, CSIF en contra, UGT abstención
- C1: CIG en contra, CCOO a favor, CSIF a favor, UGT a favor
Para a convocatoria de C2-auxiliar administrativo (descargar) son de aplicación a maioría dos puntos referidos anteriormente. Pero cabe destacar o cambio aplicado na proba de informática.
- Engadiron temas de informática no programa
- Indican que a proba práctica escrita será sobre procesador de textos e folla de cálculo, como era antes, pero engaden “presentacións”. Se esta proba era xa dura demáis, agora peor.
- Por riba, meten un curso selectivo posterior en informática. As persoas que superen os exercicios deben superar tamén o curso selectivo. A CIG está disposta a falar deste curso, pero dende unha optica de formación, non de selección, sobre contido necesario para as tarefas (rexel, notifica..), e dirixido a todo o persoal funcionario que teña que traballar con ferramentas ofimáticas, non só auxiliares.
- Os catro sindicatos votamos en contra.
Promoción interna C1-Vixiantes de estradas (descargar):
- Son promocións internas restrinxidas unicamente a dúas categorías de persoal laboral fixo.
- Debido a múltiples sentenzas xudiciais, esta promoción nace de dous pactos de fai anos, un aceptable apoiado pola CIG, e outro que forza á funcionarización que non apoiamos.
- Tal e como está deseñado, en realidade o primeiro exercicio son dúas probas eliminatorias, sendo unha delas de suposto práctico que moito tememos que vai ser unha barreira infranqueable para a maioría das persoas obxecto da promoción.
- Como noutras promocións internas, non se comprometen a garantir a localidade de quen promocione.
- A diferenza doutras promocións internas nas que puntúan a antigüidade na administración, neste caso puntúan unicamente a experiencia nas categorías obxecto da promoción, o que pode producir que xente recen chegada á administración puntúe máis que xente máis antiga aínda que con menos anos na categoría.
- CIG votou en contra. CCOO abstívose. CSIF e UGT a favor.
- Detalles
Dende Recursos Humanos do Sergas informan de que o xoves 23 de xuño publicarán no DOG a resolución co listado definitivo das persoas aspirantes admitidas e excluidas no proceso selectivo para o ingreso en diversas clases de persoal funcionario de Administración especial, escala de saúde pública e administración sanitaria (Lei 17/1989).
Pois xa era hora. A convocatoria do proceso selectivo foi publicada no DOG do 09/12/2021, e 6 meses e medio despois por fin temos o listado definitivo de persoas admitidas/excluídas.
Cando vai ser o primeiro exercicio? Por desgraza non temos información do interese. Durante a negociación da convocatoria a CIG insistiu en incorporar unha referencia á data prevista para ese primeiro exercicio. E Sanidade-Sergas.. negouse.
Agora o único que temos é o último que manifestou o director xeral de Función Pública (24/05/22): que non sabía se o tribunal estaría nomeado antes ou despois de agosto, e que creía que o exame non sería antes de setembro. Eso, como mínimo, son 9 meses dende a convocatoria. Seguimos sen previsión.
- Detalles
Máis do mesmo. Vimos de ser convocados para unha nova xuntanza coa consellería do Medio Rural na que, pese á nosa oposición manifesta nas xuntanzas previas, pretenden negociar no mesmo lote a RPT da consellería cun "experimento" de creación dunha oficina móbil agraria para todo o país. E todo isto aderezado coa amortización de postos de traballo.
A xuntanza terá lugar o vindeiro martes 21 de xuño. Podes descargar a documentación e se tes algo que comentar, podes facelo a través deste formulario para contactar coa CIG.
- Detalles
A Administración tráenos un acordo para “negociar” coma se fora algo novo e non existira unha orde de carreira anterior
A proposta de Función Pública constitúe unha fraude dirixida a evitar o cumprimento das sentenzas gañadas pola CIG e que supoñen que todas as persoas empregadas públicas, se cumpren os requisitos, deben ter dereito á carreira profesional.
Despois de que a Xunta perdese todas as demandas que levamos adiante e de que tanto o Tribunal Superior de Xustiza de Galiza como o Tribunal Supremo lle deixasen as cousas claras, nun exercicio de malabarismo quere facernos crer:
1. Que se “confundiran coa terminoloxía” e na vez de negociar daquelas un acordo para introducir unha “carreira administrativa”, fixeron un acordo sobre a carreira profesional, publicando varias veces a “confusión” no DOG. Pretenden, a ver si cola, que o acordo que fixeron con CCOO e UGT non existe e polo tanto non se derivan dereitos del.
2. Que o grao II se inicia agora de novo, cando está contemplado no acordo anterior con datas concretas e que non quixeron desenvolver cando non había nin sentenzas nin nada que llo impedira. E agora queren que os subgrupos C1, C2 e AP perdan 18 meses de grao II e os A1 e A2 6 meses, sinxelamente porque eles non quixeron convocar a orde de acceso ao grao II e CCOO e UGT escolleron non esixir o cumprimento do acordo para facer campaña contra a CIG.
3. Que como os tribunais recoñeceron a carreira profesional para o persoal laboral, e iso era unha “confusión”, esta nova “carreira administrativa” e non profesional, mantén a exclusión directa de todo o persoal laboral.
4. Que temos que consolidar algo que xa estaba consolidado (o grao I extraordinario).
E que imos facer nós?
Dende logo non imos aceptar alegar a un acordo de “carreira administrativa” cando o que teñen é que executar o acordo de carreira profesional. Non vale facer de avestruz e meter a cabeza no buraco negando a existencia dun acordo de carreira profesional no que os tribunais, como nas leiras, moveron os marcos, co que AMPLIARON os efectos..
O que imos facer é esixir que cumpran, que paguen o grao II con efectos retroactivos, e que fagan a extensión a todas as persoas empregadas públicas.
- Detalles
O pasado 9 de xuño celebrouse o Día internacional dos arquivos e en todo o mundo as institucións arquivísticas celébrano con “días de portas abertas”, conferencias, presentación de libros e multitude de actos de difusión.
Na Xunta de Galiza tamén se fan, como non podía ser de outro xeito, actividades especiais de divulgación sobre todo nos arquivos históricos.
Pero que pasa cos arquivos administrativos? Cos que gardan o patrimonio documental dos últimos 35 anos de Galiza e que coincide basicamente co patrimonio documental da Administración galega?
O parlamento galego aprobou en 2014 a Lei de arquivos e documentos de Galiza que incidía na posta en marcha da rede de arquivos administrativos da Xunta de Galiza e obrigaba a elaborar un Plan de Arquivos no prazo de un ano, plan que ía detectar as deficiencias e problemáticas do sistema e poñerlle remedio.
Está feito o Plan no 2022? NON.
Isto supón que:
• De todas as consellerías da Xunta só en dúas hai agora persoal técnico cualificado xestionando a súa documentación. (áreas de Cultura e Industria).
• Non están creadas nas relacións de postos de traballo as unidades de arquivo central como órgano administrativo.
• As delegacións territoriais da Coruña e Ourense non teñen creado o seu arquivo territorial polo que acumulan a documentación totalmente descontrolada.
• As prazas existentes que están vacantes non se cubren en anos. (Por exemplo a única praza de Técnico superior do Arquivo Histórico de Pontevedra leva 6 anos vacante).
• As consellerías non teñen quen organice e planifique as transferencias documentais, coa saturación documental das oficinas, depósitos descontrolados, perdas e eliminación descontroladas, buscas eternas de documentación, etc.
Por iso dende a CiG levamos anos reclamando que en todas as modificacións de RPTs se inclúa a creación do arquivo central en cada consellería e se dote de persoal técnico axeitado.
Pero para identificar as verdadeiras necesidades fai falta o famoso Plan de Arquivos que por desidia ou incompetencia segue sen elaborarse.
Menos celebración e máis xestión.
- Detalles
O martes 31 de maio de 2022 tivo lugar a 2ª xuntanza do grupo de traballo que trata a elaboración dun novo regulamento para a escala de Axentes Facultativos Ambientais (o anterior e de 1997). Asisten a mesma representantes das consellarías de medio rural e medio ambiente e das organizacións sindicais.
A representación da Administración comeza renegando do acordado na primeira xuntanza: empregar como documento base a proposta consensuada no ano 2017 polas organizacións sindicais. A CIG o considera inaceptable e solicita levantar acta do acordado nas xuntanzas para evitar estas situacións de falla de credibilidade e confianza na Administración que bota por terra os avances no traballo deste grupo. A Xunta négase con rotundidade alegando que ao ser un grupo de traballo non procede levantar acta.
A única documentación que aporta algo de proveito é a presentada pola Dirección Xeral en Defensa do Monte (DXDM). A Dirección Xeral de Patrimonio Natural (DXPN) non aporta documento (tan só escusas) e a Dirección Xeral de Planificación e Ordenación Forestal (DXPOF) presenta un texto pobre que non recoñece a realidade actual dos sectores forestal e medioambiental, e para máis menosprezo o representante desta dirección xeral califica o acordo consensuado polas organización sindicais como demasiado extenso e detallado, piden algo máis sinxelo (parece que están máis cómodos na indefinición).
A CIG, despois de escoitar as intervencións da administración e comprobar a falla de vontade para o avance das negociacións, propón un calendario de xuntanzas que realmente active o traballo do grupo. A proposta é aceptada pola DXDM, pero os representantes da DXPN e DXPOF argumentan que non poden comprometer unha data sen consultar aos seus superiores. En consecuencia evidencian a falla de capacidade para tomar decisións ata tal extremo que non son quen de aceptar ou propoñer unha data para a seguinte xuntanza.
A conclusión ao fin da xuntanza é que a Xunta non ten interese no avance deste grupo de traballo pois adiou a xuntanza convocada para o 25 de abril unilateralmente, non presenta documentación de proveito e non envía representantes con capacidade real de negociación e compromiso. A elaboración do novo Regulamento de Axentes Ambientais que ten como obxecto adecuar o servizo público e a escala a realidade actual non é prioritario para a nosa Administración.
A CIG non vai a aceptar un acordo de mínimos que non teña en conta os consensos acadados entre as organizacións sindicais, as novas especialidades e as necesidades actuais dos sectores forestal e medioambiental.
- Detalles
Función Pública envía ás organizacións sindicais un borrador para unha nova carreira profesional. O texto é de traca: cambia de nome á carreira profesional por carreira administrativa, para así xustificar esta nova proposta na que modifica os tramos do sistema extraordinario de carreira coméndose o 2021 para os grupos C1, C2 e AP; segue a excluír a metade do persoal na Xunta; e perpetúa a diferencia salarial entre os grupos baixos e altos.
O que destacamos:
- Os grupos C1, C2 e AP perderían un ano enteiro de grao II anticipado a pesar de que estaba orzamentado para o 2021 e non o aplicaron porque non lles deu a gana (incumpriron o que pactaron incluso cando non había sentenza algunha).
- Deixa fora ao persoal laboral (fixo e temporal) aínda que ten dereito a carreira porque así o sentenciou a xustiza. Fan así porque queren manter a carreira como chantaxe para obrigarlles a funcionarizarse.
- Mantén as contías para cada grupo cunha diferencia de máis de tres veces entre o grupo A1 e a Agrupación Profesional.
- Inventan unha nova denominación non prevista nin na LEPG nin no TREBEP: o de carreira administrativa (que substitúe ao de carreira profesional) para xustificar este novo acordo.
- Ameaza con alongar as anualidades e/ou as porcentaxes de pagamento si se amplía o ámbito subxectivo.
- É de risa, consolida o que xa tiñamos consolidado: o grao I extraordinario.
- Non se compromete a publicar o futuro acordo nunha orde para que non se paralice por caprichos do director xeral así pode seguir chantaxear con este complemento salarial.
- Volve a deixar os futuros pagamentos “en función das dispoñibilidades orzamentarias”
Na CIG imos alegar este novo Acordo pero xa adiantamos que é inaceptable.
- Detalles
O luns 6 de xuño é o cese das persoas que obtiveron posto no concurso de traslados de corpos xerais convocado en novembro de 2019 (tardou dous anos e medio en finalizar). E as tomas de posesión destes compañeiros e compañeiras van a coincidir coa posesión definitiva de quenes estaban en destino provisional.
Como o concurso de traslados xa fora convocado con atraso puido participar quen obtivo destino no concurso anterior. Así que foi enorme a cantidade de compañeiros e compañeiras que decidiron participar e obtiveron destino. Non só ocupando postos vacantes, senón tamén os cambios producidos en resultas.
As prazas vacantes ofertadas no concurso foron as existentes a xuño do 2020 (hai que sumar as resultas, que non son vacantes). Estamos nuns anos dunha alta cantidade de xubilacións, e todas as posteriores vacantes producidas durante estes dous anos, xeran un número enorme de prazas non ofertadas que van utilizar para as comisións de servizos.
Estamos, xa que logo, ante un momento de enorme mobilidade. E xa todo o mundo escoitou falar de xente que tiña que ir a un posto e vai ir a outro. Algunhas persoas mediante comisións de servizo (mesmo a postos de libre designación). Outras movidas irregularmente. E algunha outra simplemente enganada.
Estou realmente no meu posto de traballo?
Pensabas que o teu posto de traballo estaba nun servizo e queren que vaias para outro? A clave está na Relación de Postos de Traballo (RPT).
Tes acceso a todas as RPT dende o web de Función Pública. Poñémoscho doado, vai a https://i.gal/rpt. Escolle a túa consellería e abre o primeiro dos documentos, que será a RPT en formato pdf. Se premes simultaneamente nos botóns Ctrl+F abrirá a caixa de busca. Introduce o teu código de posto, que terá o formato 00.000.00.000.00000.000
Unha vez localizado xa poderás ver cal é o teu centro de destino. Este vai variar segundo a consellería. Nalgúns casos (poucos), pode ser un servizo. Na maioría será unha estrutura superior (xefatura territorial, subdirección..). Se queren que vaias a un centro de destino diferente, estarás nunha situación irregular.
Dentro do centro de destino o habitual é que os postos base poidan movelos libremente dentro do centro, e as xefaturas de sección e negociado estarán asignadas a un servido determinado. Isto podes observalo na RPT: se o teu posto vai debaixo dunha xefatura, esa é a súa localización, polo que se queren que vaias a outro servizo ou sección, estarás ubicado/a irregularmente; caso de que non teñas xefaturas enriba, estás asignado/a ao centro de destino en conxunto e dentro del poden moverte.
Se tes dúbidas, contacta coa CIG. Ten a man o teu código de posto de RPT (podes consultalo na resolución do concurso ou de destino definitivo; tamén no Portax).
As funcións
As persoas responsábeis da política da Administración Autonómica non queren regular as funcións polo miúdo máis alá dalgúns acordos parciais e as xeneralidades que aparecen na Lei 2/2015, do emprego público de Galiza (LEPG), artigo 41 e disposición adicional 8ª e 9ª. Na maioría dos casos a redacción é suficientemente ambigua como para ter dúbidas. E non teñen interese en redactalo con maior concreción.
Son moitos os casos de desvíos nas funcións, ás veces por recibir ordes abusivas, ás veces porque nos agradan máis outras tarefas. Cando facemos tarefas superiores estamos a aforrarlle diñeiro á Administración, pois así evita convocar prazas de maior responsabilidade.
Se despois de darlle unha lectura ás túas funcións recollidas na LEPG continúas con dúbidas, contacta coa CIG.