As tres organizacións sindicais, xa desde a Plataforma en Defensa do Servizo Público de Prevención e Defensa Contra Incendios Forestais, condenamos as actuacións dos incendiarios pero nos parece unha burla do Goberno que todos os anos por estas datas saia dicindo que se van endurecer as penas, que se vai a facer máis persecución, que se lles van cobrar os gastos de extinción aos que poñen o lume... Todo iso nos parece ben, pero é evidente que non é algo que este Goberno queira facer de xeito decidido e usando todas as ferramentas, medios e persoal que ten ao seu alcance. Non é posible a detención de culpables sen unhas boas tarefas de investigación, entón, como se van a deter máis culpables se non se potencia o traballo de investigación?

Que fai a Xunta de Galicia neste tema?. Derivar as responsabilidades propias asumidas competencialmente cara organismos e empresas alleos á Administración galega. Sen embargo, non dota de recursos aos 550 axentes forestais e medioambientais con competencias, coñecementos e experiencia necesaria para realizar estas investigacións, tal e como veñen demostrando durante todos estes anos. Pola contra, para a Consellería esta labor permanece practicamente no esquecemento e non mostra ningún interese por desenvolvela.

UGT, CCOO e CIG reclamamos da Xunta de Galicia a posta en valor do traballo de Investigación de Incendios a través de persoal propio da Administración galega e a súa potenciación dotando dos medios adecuados para a investigación aos corpos de axentes medioambientais e forestais que son axentes da autoridade e policía xudicial. Esta é a única garantía xurídica que ten a cidadanía galega de que as investigacións cumpran coa legalidade.

Ligazón: Xornal Praza Pública