- Detalles
Hai máis de 3.000 compañeiros/as que no caso de emerxencias ou traballos especiais poden actuar
Un mes despois de que a Xunta coñecera a chegada destes residuos as praias non ten mobilizado a ningún medio propio (a maiores do habitual nesa zona en calquera época do ano) para o seu control, coordinación ou recollida aínda que á CIG-Autonómica cónstalle que o persoal si llo pediu e ofreceuse voluntario.
A Consellaría de Medio Ambiente ten persoal de campo, vixiantes de recursos, peóns e oficiais de recursos naturais e axentes ambientais en todo o territorio. Máis de 3.000 compañeiros e compañeiras que no caso de emerxencias ou traballos especiais poden actuar.
En concreto, que no colectivo de persoal funcionario hai 107 axentes; 2 axentes ambientais coordinadores; 19 axentes territoriais e 35 axentes zonais. E no colectivo de persoal laboral, 63 peóns forestais; 3 técnicos/as ambientais; 15 técnicos/as superiores ambientais e 98 vixiantes de recursos naturais.
Xunto a isto a Xunta conta con medios e vehículos e que están preparados. Ademais, no caso das e dos axentes ambientais pode activarse o período extraordinario cun sistema de gardas, polo que pasan a facer xornadas de 12 horas e poden mobilizarse por todo o territorio nacional.
Porén, a Consellaría de Medio Ambiente considerou que non era necesario, ignorando as capacidades do seu propio persoal que poderían ter unha función relevante, non só no control, senón tamén na coordinación de que as tarefas de limpeza non danaran áreas protexidas como os complexos dunares, especies catalogadas ou alteraran zonas de nidificación nestas contornas de alta sensibilidade ambiental. Ángeles Vázquez na súa batalla política preferiu minimizar a crise ambiental e despois derivar a responsabilidade contra o Gobierno na vez de mirar para dentro e contar co seu propio persoal tanto técnico como o de campo.
Para que contratar empresas?
Segundo a propia Administración, o persoal da Consellería do Mar e o persoal da zona da Consellería de Medio Ambiente si fan súas funcións en carteleira e zona habitual, sen activarse ningún reforzo porque non é necesario e non é un Prestige . Por iso preguntámonos entón por que contratan empresas? Para que fan falla voluntarios/as? Para que pedir recursos da Administración do Estado?
Ignorar ao persoal propio non é a primeira vez que sucede coa Consellería de Medio Ambiente de Ángeles Vázquez, pois nos lumes que asolaron a Rede Natura ou mesmo os Parques Naturais, nestes anos, non activou nin sequera o período de gardas dos seus axentes ambientais (período extraordinario) para contar con maior cobertura de persoal, nin antes nin durante nin despois, para xestionar as posibles tarefas de restauración ambiental.
Antes, ou ao tempo de contratar ao persoal de empresas públicas, como nestes días fixo con SEAGA e TRAGSA, debería ter solicitado ao outro persoal de emerxencias que ten a Xunta por toda Galiza, comarca a comarca: os bombeiros e bombeiras forestais e o axentes ambientais da Consellería de Medio Rural, que traballan as 24 h todos os días do ano e poderían traballar desde a primeira chamada. E temos tamén a mais de 600 compañeiros e compañeiras fixos e fixas descontinuas en período de suspensión de contrato. En síntese, máis de 3.000 efectivos preparados en emerxencias no medio natural ignorados.
Dende a CIG-Autonómica lembramos que no caso do Prestige si se mobilizou a todo este persoal, tarde e mal, cando xa se autoorganizaran. Por iso lamentamos que non se aprendera desa experiencia. A realidade é que non existe un protocolo nin unha planificación clara para estas emerxencias, sexan do nivel que sexan, máis cando hai que actuar rápido e a Xunta ten os medios, ten o persoal no territorio e ten o coñecemento.
- Detalles
O día 16/01/24 as catro organizacións sindicais asinantes do Acordo sobre as condicións de traballo do persoal dos centros de xestión propia da Consellería de Política Social e Xuventude solicitamos a convocatoria urxente da comisión de seguimento do antedito acordo, co fin de tratar as seguintes cuestións:
- Carteleiras para o ano 2024.
- Asuntos particulares dos días 24 e 31 de decembro de 2023.
- Noite de domingo ou festivo.
- Convocatorias das subcomisións.
Pois...dito e feito. Función Pública acaba de convocar a comisión de seguimento para o venres 19 de xaneiro.
Sorprende a celeridade de Función Pública ao convocarnos só dous días despois de terllo solicitado. No pasado non ten amosado tanta rapidez, polo que agardamos que non sexa flor dun día e que non teña nada que ver con que esteamos a un mes das eleccións autonómicas...
- Detalles
A Dirección Xeral de Función Pública achegounos o borrador do concurso ordinario para a provisión de postos de traballo vacantes de corpos e escalas de administración especial da Administración Xeral da Xunta de Galiza, escalas de enxeñeiros/as, enxeñeiros/as técnicos/as, arquitectos/as, arquitectos/as técnicos/as e ciencias, e da escala de axentes de inspección de consumo da Admón. Xeral da Xunta de Galiza, con prazo para presentar alegacións ata o día 22 de xaneiro de 2024.
Podes descargar as propostas nas seguintes ligazóns:
- Enxeñeiros/as, enxeñeiros/as técnicos/as, arquitectos/as, arquitectos/as técnicos/as e ciencias
- Inspección de consumo
Na seguinte ligazón podes descargar o borrador de postos a ofertar no concurso de inspección de consumo.
Se resulta do teu interese, contacta coa CIG.
- Detalles
O director xeral de Función Pública vén de convocar ás organizacións sindicais a dúas xuntanzas (Mesa Sectorial de Funcionarios e Comisión de Persoal) que terán lugar o venres 19 na que se tratarán varios procesos selectivos.
Na Mesa Sectorial de Funcionarios Públicos discutiranse as bases de convocatoria dos seguintes procesos selectivos de promoción interna separada correspondentes á OEP do 2021.
- A1-Sistemas e tecnoloxía da información
- A2-Xestión de sistemas de informática
- A1-Finanzas
- A2-Inspectores/as de consumo
- A1-Enxeñaría agronómica
- A1-Enxeñaría industrial
- A1-Enxeñaría de minas
- A1-Enxeñaría de montes
- A2-Enxeñaría técnica agrícola
Na Comisión de Persoal someteranse a votación as bases dos seguintes procesos selectivos de acceso libre que foron "negociados" previamente na Mesa Sectorial de Funcionarios do 12/01/24:
- A1-Veterinarios/as oposición
- A1-Veterinarios/as concurso-oposición
- A1-Bioloxía
- A1-Finanzas
- A1-Medicina
- A2-Inspección turística
- A2-Enfermería e educador/a social
- A2-Subinspección urbanística
- A2-Técnica de finanzas
- B-Educación Infantil
- C2-Persoal de servizos xerais (PSX)
- C2-Xerocultor/a
- C2-Auxiliar de laboratorio
- AP-Persoal subalterno-discapacidade intelectual
- Detalles
O vindeiro xoves 25 de xaneiro terá lugar en San Caetano unha mobilización do persoal do SPIF por un servizo de emerxencias, unhas condicións de traballo dignas para todas e pola eliminación da precariedade laboral.
A Xunta non arranca coa negociación dunhas condicións de traballo para o persoal funcionario e laboral que traballamos cos lumes e sigue adiando e dando bandazos sen sentido. O persoal levamos reclamando a negociación dunhas condicións de traballo dignas bastante tempo e esiximos que non se paralicen as negociacións.
A consellería de Medio Rural e o resto de OOSS non queren avanzar na negociación, querenos sen dereitos laborais e condicionar todo a unha funcionarización chantaxeada coa carreira profesional e sen garantías laborais previas e por eso están a facer o posible para adiar o proceso negociador, antes por partes agora todo xunto logo ….¿que dirán? O tempo pasa e non temos unha xuntanza dende o pasado 09 de novembro nin a admon respostou as alegacións presentadas).
E mentras pasan os días o persoal funcionario do servizo está sen condicións laborais,o persoal laboral cos dereitos suspendidos por unha lei do ano 2012 que se empeñan en manter para seguir cos recortes, e os compañeiros e compañeiras de 6 meses condenados á precariedade e a pobreza.
Pretenden dividirnos e establecer clases de dereitos co ultimo xiro da negociación onde directamente exclúen ao persoal laboral, a máis da metade dos bombeiros e bombeiras forestais do servizo. Todas xuntas somos mais fortes e non podemos permitir que afonden na diferenciación que leva a discriminación.
Na CIG loitamos polo emprego de calidade e temos claro que o servizo de prevención de incendios forestais é un servizo que non pode unicamente adicarse a “apagar lumes”, SOMOS UN SERVIZO que atende as MULTIEMERXENCIAS e a Xunta de Galiza segue a ignorarnos e a ningunearnos. E temos o exemplo clarísimo estes dias cando nunha crise ambiental gravísima que está a sufrir as nosas costas non mobiliza a ningún so recurso propio ignorando asas capacidades e implantación do persoal do servizo de incendios en todo o territorio galego.
O persoal coa CIG defendemos o servizo público, reivindicamos e aportamos propostas de cara a facer valer os recursos propios e públicos da GALIZA, incluídos na lei de emerxencias de Galiza e sendo un servizo esencial, cada avance segue a ser unha loita de todos e todas as traballadoras e agora é o momento de termos un BO ACORDO DE CONDICIÓNS LABORAIS PARA TODO O PERSOAL; SEN EXCLUSIÓNS NIN DISCRIMINACIÓNS ABSURDAS.
Por todo isto, entendemos que hai que seguir dicindolle alto e claro á Consellería de Medio Rural que o persoal non quere seguir así.
Avanzamos loitando, mobilízate coa CIG o vindeiro 25 de xaneiro diante da Consellería do Medio Rural en San Caetano.
Haberá autobuses. Se queres apuntarte contacta cos delegados/as da CIG.
- Detalles
No DOG do 18/01/2024 a EGAP publica a RESOLUCIÓN do 10 de xaneiro de 2024 pola que se convocan os cursos de linguaxe administrativa e xurídica galega para persoal ao servizo das distintas administracións da Comunidade Autónoma de Galiza para o ano 2024.
Convócanse vinte e sete cursos de linguaxe administrativa galega e tres de linguaxe xurídica galega.
O número de prazas por curso será de 25.
Os cursos impartiranse segundo se indica a seguir:
– Administración xeral da Comunidade Autónoma de Galicia, institucións e entidades públicas instrumentais do sector público autonómico:
12 cursos medios de linguaxe administrativa galega.
9 cursos superiores de linguaxe administrativa galega.
- Administración de xustiza e outros colectivos relacionados coa xustiza de Galiza:
2 cursos medios de linguaxe xurídica galega.
1 curso superior de linguaxe xurídica galega.
– Entidades locais de Galiza:
3 cursos medios de linguaxe administrativa galega.
1 curso superior de linguaxe administrativa galega.
- Universidades de Galiza:
1 curso medio de linguaxe administrativa galega
1 curso superior de linguaxe administrativa galega
O prazo de presentación de solicitudes será desde o día seguinte ao da publicación desta resolución no Diario Oficial de Galiza e ata o 31 de xaneiro de 2024.
- Detalles
No DOG do 17/01/2024 a EGAP publica a RESOLUCIÓN do 9 de xaneiro de 2024 pola que se convocan cursos para o persoal empregado público das entidades locais e do sector público autonómico de Galiza.
De acordo co Convenio de colaboración subscrito entre a Escola Galega de Administración Pública e o Consello Consultivo de Galiza para o desenvolvemento de actividades de formación, divulgación e investigación, convocan os cursos que figuran no anexo II, que deberán desenvolverse segundo as bases detalladas no anexo I.
Poderán participar nas accións formativas convocadas nesta resolución os/as empregados/as públicos/as das entidades locais e do sector público autonómico de Galiza, que se encontren en situación de servizo activo (incluído o persoal que teña concedido un permiso por motivos de conciliación da vida persoal, familiar e laboral) e que reúnan os requisitos establecidos nesta convocatoria e para cada un dos casos no anexo II.
O prazo de presentación de solicitudes será desde o día seguinte ao da publicación desta resolución no Diario Oficial de Galiza ata o día 29 de xaneiro inclusive.
As solicitudes de participación nas actividades formativas só poderán realizarse mediante o formulario de matrícula telemática dispoñible no enderezo <https://egap.xunta.gal/matricula> desde as 9.00 horas da data de inicio do prazo de presentación de solicitudes ata as 23.55 horas da data de finalización. As solicitudes entenderanse presentadas unha vez que se complete correctamente o proceso de matriculación.
- Detalles
Ante o retraso na entrega dos patróns de carteleiras aos Comités de Empresa, para o seu estudo e alegacións, as 4 organizacións sindicais asinantes do Acordo sobre as condicións de traballo do persoal dos centros de xestión propia da Consellería de Política Social e Xuventude, vimos de solicitar á Dirección Xeral da Función Pública a convocatoria urxente da Comisión de seguimento, co fin de tratar as seguintes cuestións:
- Carteleiras para o ano 2024.
- Asuntos particulares dos días 24 e 31 de decembro de 2023.
- Noite de domingo ou festivo.
- Convocatorias das subcomisións.
Entendemos que a convocatoria da Comisión é urxente, xa que a data de 15 de xaneiro non están presentadas as centrais sindicais practicamente ningunha proposta de carteleira nas Xefaturas territoriais, é máis, están a manifestarnos que primeiro teñen que ser remitidas a Comisión de seguimento en Compostela, o que vai a provocar, na práctica, que ditas carteleiras non entren en vigor o 01.02.2024, incumprindo, de novo, o Acordo.
- Detalles
Dende a Dirección Xeral de Función Pública achegaron o borrador de postos que se ofertarían nun próximo concurso de traslados das escalas de inspección de consumo.
Os sindicatos temos de prazo para facer alegacións ata o vindeiro venres día 19 de xaneiro. Se é do teu interese, podes contactar coa CIG.
- Detalles
O venres 12 de xaneiro tivo lugar unha xuntanza da Mesa Sectorial de Negociación do Persoal Funcionario (MSF) na que se trataron as convocatorias de diversos procesos selectivos de acceso libre e promoción interna. Dentro do punto de Rogos e preguntas, o director xeral de Función Pública deu información de: concursos de traslados ..
CONVOCATORIA DE PROCESOS SELECTIVOS
Discutimos as bases das convocatorias dos procesos de acceso libre e promoción interna de:
- A1: veterinarios, biólogos, finanzas, medicina, e a modificación da convocatoria xa publicada de inspección turística
- A2: enfermaría e educador social, finanzas
- B: educación infantil
- C2: PSX, xerocultor, aux. laboratorio
- AP: subalterno (con discapacidade intelectual)
O que defendeu a CIG foi (a grandes liñas):
- Procesos baixo a forma de concurso-oposición
- Promoción interna separada do acceso libre. Naqueles procesos en que xa existe outra promoción separada (PSX, A1-Finanzas ou B-Educ. infantil), retirar a promoción interna destas convocatorias e unila á promoción interna separada existente. Concordamos coa promoción interna vertical dende calquera escala do subgrupo inferior, pero queremos tamén a promoción horizontal que permita cambiar de escala dentro do mesmo subgrupo.
- Exercicios: en seis meses. Non temas, nin oral nin lectura, todos tipo test (cuestionarios ou supostos prácticos). Cada exercicio sobre partes diferentes do programa, sen repetir materia. Nota de corte en todos os exercicios.
- O programa en base a normas de dereito positivo. Si non é posíbel, que editen manuais ou publiquen referencias bibliográficas.
- En promoción interna facilitar conservar a localidade, recualificando si é posíbel, descentralizar a administración. Non obrigar a permanecer no posto cando estea aberto ao subgrupo ao que se accede.
- Durante o período de prácticas (finanzas ou turismo), que paguen o 100% das retribucións.
- Advertimos que en A2-Finanzas non existen diferenzas entre acceso libre e promoción interna.
Estas convocatorias xa foran discutidas nunha xuntanza previa o mércores 10, e sobre elas presentan tres novidades:
1. A1-Veterinarios/as: dividiron a oferta en dúas convocatorias, unha mediante concurso-oposición (38 prazas), e outra mediante oposición (55 prazas). O exame sería o mesmo día. A CIG solicitou que tanto este proceso como todos os demais, sexan mediante concurso-oposición. E de manter a división en dous procesos, rexeitamos que obriguen a ter que elixir un proceso. O director xeral de Función Pública remata afirmando que van a reconsiderar a simultaneidade dos dous procesos.
2. Prazo para a realización do primeiro exercicio: fixeron caso a outros sindicatos e amplían os prazos para que o primeiro exercicio non sexa antes dos 9 meses. Pero no caso de finanzas recortan a tan só 3 meses. A CIG manifestou que:
- Queremos proceso áxiles, que non pasen de 12 meses dende a convocatoria ata a toma de posesión, polo que defendemos que o primeiro exercicio sexa aos 6 meses.
- As persoas candidatas teñen o dereito de poder organizar a súa vida, polo que a Administración debe ofrecerlles unha previsión de datas. Non nos vale a fórmula de “non antes de..”, pois Función Pública incumpre case sempre os prazos, chagando a duplicalos.
- E no caso de finanzas, 3 meses é irracional.
3. Finanzas: van a conservar os exercicios aprobados do anterior proceso selectivo.
As convocatorias poderían quedar aprobadas nunha Comisión de Persoal o venres 19 de xaneiro. O día anterior teriamos outra xuntanza, na que tamén falariamos da promoción interna separada da que nos enviaron borradores en decembro.
ROGOS E PREGUNTAS
Concursos de traslados
- Afirma o DXFP que están a traballar nas RPT de funcionarización e despois sacarían o concurso de traslados de administración especial. Indica que non de todas as escalas pero si dunha gran parte delas (menciona: enxeñerías, bioloxía, química, “e algunha mais”). Afirma que ten dúbidas de si entra o de veterinarios/as.
- E que tamén están a preparar o concurso én da administración xeral (refírese a corpos xerais, non ás escalas)
- A negociación sería ao longo deste mes ou a principios do seguinte.
- Neste mes pecharemos o concurso de gardacostas.
- A CIG insiste en que teñen que convocar os concursos de TODOS os corpos e escalas para que poidan estar rematados a 31/12/2024.
Acreditación de méritos para fases e concurso
- Na semana do 22 (podería ser o día 24), publicarán a resolución para acreditar os méritos dos procesos selectivos por concurso da Lei 20/21, dos subgrupos A1 e A2.
- Tamén sairá esa semana (ou bastante cerca) para uns procesos con fase de concurso anteriores á Lei 20/21 que teñen rematada a fase de oposición (acceso libre, estabilización e promoción interna).
- Para a presentación dos méritos agardar ata que abran no Fides. Darán prioridade á documentación que chegue para os procesos unha vez que abran o prazo.
Eleccións de destino (e excedencias)
- A mediados da semana do 15 publicarase a elección de destino definitivo de finanzas (A1 e A2) e abrirán o prazo para elección de destino para algunhas escalas (menciona enxeñería industrial e “algunha de A2”).
- Informa de que nos procesos de bombeiros forestais (emisoristas, vixiantes..), solicitáronse 42 excedencias por interese particular (16) ou por servizos no sector público (26) para 255 prazas, e seguen a chegar peticións co que estamos chegando ao 20% de excedencias.
Listas de substitución
- Publicarán a principios de semana a cobertura de prazas para listas de política social nas que había problemas de listas. Menciona principalmente enfermaría, aux. de enfermaría e medicina. A actualización xa a teñen feita.
Días de asuntos propios
- Informamos dun erro no Portax, xa que aparecen 7 e non 8 días de asuntos propios para o 2024. Di o DXFP que o revisarán.
Consorcio
- Afirma o DXFP que están a traballar na integración do persoal laboral fixo. Di que son máis de 200 persoas, que xa falta pouco, e que a maioría dos expedientes xa están completos.
