- Detalles
A directora xeral de Emprego Público e Administración de Persoal vén de convocarnos a unha Mesa Xeral de Empregados Públicos que terá lugar o vindeiro 1 de xullo na que se tratará o seguinte:
- Proposta de Protocolo da Xunta de Galicia para a protección ás persoas empregadas públicas vítimas de violencia de xénero.
Se tes algo que comentar, contacta coa CIG.
- Detalles
Despois de ter solicitado a CIG unha xuntanza coa Consellaría, esta convocounos á comisión de seguimento. Acceden a tratar outros asuntos que exceden do ámbito da comisión, ao igual que os outros sindicatos, o cal xa é algo positivo.
1. Coeficientes redutores
A consellería coméntanos que está a actuar “politicamente” e que falaron co “grupo parlamentar no Congreso e no Senado” (sic) para impulsar unha lei que recolla os coeficientes redutores. Non sabemos con que grupo pero todos/as entendemos.
Comentámoslle que nos parece moi ben, que a CIG tamén se reuniu, pero COS GRUPOS parlamentares, incluído o grupo popular, pero que a cuestión que agora demandamos é outra, alternativa e simultánea a esta actuación.
Tampouco deixamos de demandar, e o fixemos en todas as instancias, a inclusión do persoal do Servizo de Gardacostas no Réxime Especial de Traballadores/as do Mar.
Lembramos que a instancia da CIG a consellaría solicitou ao ISM os coeficientes redutores por asimilación de funcións. A resposta do ISM foi negativa pero a consellería NON RECORREU. Un recurso podería posibilitar logo ir ao xulgado para reclamalos. Por que non recorren ou por que non o fan de novo?
Pero hai unha terceira vía complementaria que xa puxemos con anterioridade en coñecemento da consellería, e que incluso nos foi recomendada polo INSS, como é a solicitude de aplicación de coeficientes redutores por razón de actividade. Esta vía recollida no artigo 206.2 da Lei xeral da Seguridade Social, require a iniciativa conxunta das organizacións sindicais máis representativas e da Administración da que dependa o persoal.
Do manifestado hoxe por nós, as outras organizacións o apoiarían, polo que só falta que a Administración se pronuncie.
Lembrámoslle que para iniciar este camiño xa se comprometeran a aportar toda a documentación e estatística relacionada coa morbilidade como:
1. Idade absoluta e por tramos do persoal.
2. IT dos últimos 5-10 anos (xa que moitos dos trastornos musculoelesqueléticos están agochados nas IT - as mutuas non recoñecen cando esta o factor idade - ).
3. Accidentes laborais dos derradeiros 10 anos.
4. Incidentes/accidentes sen baixa. Isto tamén foi solicitado no Comité de Seguridade e Saúde Laboral e non se facilitaron.
E o único que aportaron foi unha táboa coas idades. Consideramos que antes de que remate o ano teñen que ter previamente aportado a documentación e iniciado conxuntamente con nós a solicitude. Van estudalo.
2. Creación de escalas no grupo B
Actualmente hai titulacións que se poden obter en centros da propia consellería para a obtención do título de técnico superior. No caso de patróns/patroas e mecánicos/as, esta Administración está facendo trampa, pois esixe un título de técnico (medio, cando non se especifica) e a maiores un titulo profesional que habilite para o desempeño de funcións QUE SON PROPIAS DO TÍTULO DE TÉCNICO SUPERIOR.
Noutros casos como no dos axentes ambientais se creou unha escala no grupo B para que o persoal con titulación poida acceder dende o subgrupo C1.
O xeito de dignificar a profesión, de pór en valor as titulacións impartidas pola propia consellería, de facer atractiva a escala para as persoas que se titulan é crear novas escalas no grupo B.
Descoñecen se existen outras escalas no grupo B, e aproveitamos para lembrarlles unhas cantas, que aínda que sen efectivos xa están creadas (delineantes, axentes de xestión ambiental, educadores infantís, xefes de brigada, etc). Tamén van estudalo.
3. Segunda actividade e aptos con restricións
Aquí si parece que teñen algo que aportar: van a facer cambios normativos a través da lei de medidas fiscais e administrativas para ter en conta algún outro factor a maiores da idade, como certas restricións e tamén tratarán de facer una proposta para regular as funcións.
Parécenos correcto que se aveñan a desenvolver isto. Seguimos sen incrementar as prazas para segunda actividade. Non cumpren o 5% previsto no Decreto nin na Lei de creación do servizo. Solicitamos unha vez máis e como mínimo, unha para cada base e a sua cobertura inmediata, aínda que tamén podería optarse por outros modelos.
Lembramos que, aínda que os postos de segunda actividade van na RPT cun complemento específico básico, a consellería aclarou por escrito que van respectar o complemento do posto de orixe, como indica a lei, polo que se respectarían as retribucións íntegras. Porén, a CIG segue a demandar que se indique este compromiso na columna de observacións da RPT, para maior tranquilidade de todos e todas xa que entendemos que este é un dos motivos polo que non hai demanda das prazas.
Por outra banda a consellería comenta que en relación aos aptos con restricións están buscando unha fórmula que permita crear algún tipo de postos que poidan utilizarse para estes casos e mentres duren as restricións. Que o están a tratar con Función Pública. Á CIG parécenos correcto.
4. Vacantes das escalas técnica e executiva
Temos información da próxima xubilación de persoas destas escalas, e tamén sabemos que non se estiveron a cubrir estas prazas. Débese establecer un sistema de promoción interna e non amortizar ningunha das prazas que queden vacantes. Toman nota e advertimos que estaremos pendentes para a próxima oferta de emprego.
5. Recoñecementos médicos
Recoñecen que teñen un problema co Real Decreto 505/2024 de recoñecementos médicos. Din que fixeron consulta co ISM porque a norma esixe estar no RETM. Advertímoslles que ou se soluciona isto ou todo o servizo vai quedar inoperativo e que isto é unha máis das incongruencias de non ter integrado ao persoal funcionario de gardacostas no RETM.
6. Baixas, carteleiras e acordo
Na anterior comisión de seguimento instamos á consellaría a que solicitase establecer un sistema áxil de cobertura de baixas, permisos, vacantes, etc., como o dos centros de ensino ou política social, onde as baixas se cobren incluso ao día seguinte de comunicalas. Fíxose algo? A consellaría confesa que non.
Este é un dos maiores problemas e condiciona a elaboración das carteleiras: a falta de persoal e a desidia en atallar a súa falta. Desta situación derívase que non se cumpra co acordo e que se teña que recorrer a acordos singulares en cada unidade para garantir a prestación do servizo e os dereitos do persoal.
A isto hai que sumarlle a falta de efectivos por non convocar as 10 prazas de patrón/patroa e as 13 de mecánico/a pendentes da OEP do 2022. A maiores, a administración debe abrir as listas de contratación pois nestes momentos só hai 2 patróns/patroas nas listas e ninguén en mecánico/a.
Ou se soluciona todo isto, que xa o temos demandado en innumerábeis ocasións, ou vai ser imposible que este servizo funcione correctamente.
Entendemos que a comisión de seguimento non só debe velar pola aplicación do acordo senón para detectar cales son as eivas ao e que melloras se poden recoller e temos un acordo de hai 18 anos e polo tanto, respectando o sentido do mesmo si hai posibilidades de modificar determinados parámetros contemplados nel. E temos tamén acordos posteriores doutros colectivos que contemplan outras opcións para organizar o servizo e mellorías con respecto ao de gardacostas polo que deberían tomarse como modelo.
CONCLUSIÓN
Dende a CIG imos estar vixiantes e ver si hai vontade de cambiar as cousas:
- Neste próximo semestre temos que ver que hai propostas a través da lei de medidas de ir dando solucións novas para a segunda actividade e postos con restricións.
- Imos ver si facilitan a documentación necesaria para activar a vía do artigo 206 da LXSS para establecer coeficientes redutores para o colectivo (independentemente das iniciativas que estamos tendo dende a CIG ou das que tome a propia administración noutros eidos).
- Esperamos tamén que confirmen a resposta que lles dean dende o ISM sobre os recoñecementos.
- Vixiaremos para que tamén na lei de medidas e falando con Función Pública creen as escalas no grupo B.
- E esperemos que en setembro se plantexen crear un modelo para cubrir de xeito preferente as baixas ou vacantes do servizo, independentemente de que na próxima lei de Orzamentos se comece a considerar de unha vez por todas como un sector prioritario ao Servizo de Gardacostas.
- Detalles
A Consellaría de Medio Rural publicou as bases para a elaboración dunhas listas de contratación temporal de Bombeiro/a forestal (B.F.)-condutor de motobomba e B.F.-xefe/a de brigada. Ligazón á páxina de anuncios de Medio Rural.
Xustifican a súa proposta en que as respectivas listas elaboradas polo Decreto 37/2006 xa están esgotadas.
- Categorías : BFCMB e BFXB, laboral e funcionario. A relación de postos a cubrir está publicado nas bases.
- Vixencia das listas : ate que se incorporen as persoas novas ás listas elaboradas polo Decreto 37/2006, momento no cal estas listas quedarán sen validez.
- Documentación necesaria : Anexo I das bases máis a documentación que alega segundo o establecido na base VI. Aquí tamén hai lio, xa que di que hai que presentar o "anexo de acreditación de méritos (Anexo II)", cando o Anexo II é o anexo que ten a lista de prazas ofertadas, nada que ver cos méritos.
- Prazo de presentación: hai un lío nas bases. Dunha banda din que o prazo comeza ao día seguinte de publicación das bases, e no paragrafo seguinte pon que dende o mesmo día de publicación das bases. Xa avisamos para que corrixan.
- Presentación da solicitude: a través da sede electrónica da Xunta de Galicia, solicitude xenérica (código de procedemento PR004A), e dirixidas á Secretaría Xeral Técnica da Consellería do Medio Rural.
Importante : Só poderá presentarse solicitude para unha única provincia, quedando excluídas as solicitudes nas que se opte por máis dunha.
- Detalles
No DOG do 26/06/2024 publican a RESOLUCIÓN do 18 de xuño de 2024, da Dirección Xeral de Formación Profesional, pola que se convocan, con carácter gratuíto, cursos de linguaxe administrativa galega e cursos preparatorios para a obtención dos certificados de lingua galega, Celga, que se realizarán en distintos períodos e en varias escolas oficiais de idiomas de Galiza.
Os cursos de linguaxe administrativa galega ofertados nas distintas escolas oficiais de idiomas de Galiza figuran no anexo I desta resolución. Os cursos do primeiro cuadrimestre impartiranse entre setembro e decembro; os do segundo cuadrimestre, entre febreiro e abril.
As persoas que desexen participar nos cursos convocados nesta resolución deberán cubrir o formulario de inscrición telemática na ligazón www.eoidigital.com/preinslinguagalega. O proceso de inscrición non se considerará correctamente completado ata que as persoas seleccionadas presenten toda a documentación requirida, como se especifica no punto quinto desta resolución.
O prazo para a presentación das solicitudes será o seguinte:
– Desde o día 1 ata o 12 de xullo de 2024, para os cursos do primeiro cuadrimestre;
– Desde o 11 ata o 22 de novembro de 2024, para os cursos do segundo cuadrimestre.
- Detalles
O servizo de persoal de Medio Rural vén de achegarnos a relación de prazas que foron anunciadas en "Moura" para a súa cobertura a través das listas de contratación. Trátase de prazas de 6 e 12 meses correspondentes ao Servizo de Prevención de Incendios Forestais (SPIF)
Última hora: Medio Rural comunica que por un erro técnico tiveron que anular as prazas de 6 meses, que sairán noutra convocatoria.
- Detalles
Dende a CIG presentamos sendos recursos de reposición diante da publicación das convocatorias de concursos de traslados dos corpos xerais e corpos especiais publicados neste primeiro semestre do presente ano. Nas dúas convocatorias non se publican todas as prazas vacantes existentes, por exemplo, no caso dos corpos xerais son darredor de 180 prazas as vacantes que non saen no concurso de traslados sen darnos ningún tipo de explicación ao respecto.
En ningún dos dous procesos se convocan todas as prazas vacantes existentes e se a isto engadimos as que se atopan bloqueadas pola situación totalmente anómala e irregular das prazas de CONCURSO ESPECÍFICO (lembremos que estas prazas están cubertas en fraude de lei, mediante comisións de servizos eternas), a situación aínda é pior.
Cómpre falar tamén das prazas sobre as que existe reserva de praza, das cales sería un exercicio de transparecencia e bo facer, que se nos facilitase a información das causas que motivan tales reservas de praza.
Evidentemente son concursos de traslados deturpados, porque unha cousa é a potestade da Administración galega de organizar os seus servizos, e outra que as persoas empregadas públicas non teñamos dereito a mobilidade ao substraer unha inxente cantidade de postos destes concursos
Moito máis sangrante é a situación das escalas de corpos especiais xa que as convocatorias dos concursos de traslados levan sen convocar moitos máis anos.
Este xeito de proceder danos unha idea da falla de respeto que teñen os responsables da Administración galega cara as persoas empregadas públicas, e máis cando falamos dun tema como é a mobilidade das persoas empregadas públicas onde non pedimos incrementos orzamentarios, máis ben todo o contrario, probablemente se reduciría o gasto e melloraríamos a eficiencia e produtividade.
A CIG leva anos solicitando insistentemente que os concursos de traslados sexan PERMANENTES E ABERTOS pero a Xunta de Galiza fai caso omiso as nosas demandas.
Dende a CIG imos valorar iniciar unha campaña onde entre outras cuestións, instaremos a que realicen os cambios normativos pertinentes para garantir a mobilidade das persoas empregadas públicas, non descartando a mobilización.
CHOVE SOBRE MOLLADO
- Detalles
O pasado venres día 21 celebrouse o Comité de Seguridade e Saúde Laboral de Medio Ambiente (en adiante CSSL) onde se trataron diferentes asuntos relacionados coa seguridade e saúde dos empregados públicos. Os asuntos tratados foron variados entre os que podemos destacar a roupa de traballo e uniformidade, vehículos, formación, algunhas problemáticas nos centros de manexo de fauna...
En canto a formación temos que sinalar que a Administración fixo un resumo dos cursos que se van organizar e que se realizaron neste ano 2024; cabe destacar que en setembro do 2023 dende a CIG enviamos un documento coas actividades formativas que consideremos interesantes para os empregados públicos e encamiñadas fundamentalmente para o persoal de campo. Entre as actividades propostas pola CIG e que se levan adiante neste 2024 son as seguintes: manexo de grupos electróxenos, cartografía e orientación (curso GIS), vehículos 4x4 entre outros, curso de riscos biolóxicos.
En canto a algunhas problemáticas nos centros de traballo, na CIG destacamos dúas cuestións concretas, por unha banda, a situación dos grupos electróxenos do Parque Nacional das Illas Atlánticas, onde aportamos informe cun reportaxe fotográfico e onde a propia Administración recoñeceu deficiencias, comprometéndose a solventalas coa máxima celeridade, é obvio sinalar que faremos un seguimento deste tema tan delicado para a seguridade dos traballadores e máis cando se manexan máis de 100.000 litros de gasóleo ao ano.
Outro aspecto, do que dende a CIG fixemos unha queixa é no relacionado cos centros de traballo é a dificultade de cobertura das baixas nalgúns deles; existe unha discriminación clara, e que leva anos producíndose, coa provincia de Ourense en comparación coas demais, para cubrir baixas ou vacantes, ben sexa de Axentes medioambientais, vixiantes de recursos forestais, peóns..., polo que solicitamos da Administración corrixir esta situación tan anómala, inxustificada e reiterada no tempo.
No referente a uniformidade e á roupa de traballo destacar que a Administración informounos dun ACORDO MARCO coa Consellería de Medio Rural para a súa provisión, este material ía dirixido para Vixiantes de Recursos Naturais, Capataces de Establecemento, Peóns Forestais e Axentes Facultativos Ambientais. Na CIG propuxemos que se mercara roupa tamén para o persoal técnico xa que levan 10 anos sen recibila, a Administración aceptou a proposta. Como anécdota sinalar que na xuntanza participaron varios xefes de servizo e ningún deles prantexou a merca da roupa para o seu propio persoal técnico.
En canto aos vehículos, a Administración informou da posta a disposición de novos todoterreos, modelos tipo pick-up, na CIG manifestamos que non temos constancia de que se tratase ou negociase este punto en ningunha xuntanza do CSSL medio ambiente; fomos sabendo polos compañeiros que nos ían informando deste tema.
- Detalles
Neste boletín de CIG-Autonómica falamos de:
- Se o custo da vida supera a suba salarial ... gañas ou perdes?
- A Xunta retira 180 postos do concurso de corpos xerais. Por que?
- Os deberes para a nova directora de Función Pública
- Por que o chaman FAS cando queren dicir axuda por persoa con discapacidade a cargo?
- Limitación de 3 anos nas contratacións temporais e nomeamentos administrativos: as excepcións
- Estilo Galiza ou estilo PP
- Detalles
Na Comisión de Persoal do venres 21 de xuño, tanto CIG como os outros sindicatos (CCOO, CSIF e UGT) fixemos un montón de preguntas. A directora xeral de Emprego Público e Administración de Persoal (DXEP), respostou a moi poucas.
A información dos puntos da Orde do día (modificación do Decreto 165/2019, de equivalencias entre categorías de persoal laboral e escalas de persoal funcionario, RPT de funcionarización a escalas de C1 e C2, RPT da antiga consellería de Cultura, e RPT de Atriga), está nesta outra páxina: ligazón.
Previsión de datas de exames de promoción interna e acceso libre que estaban anunciadas. Despois de varios días preguntando, por fin temos resposta: ligazón.
Oposicións Veterinarios laborais en destino provisional: varios deles están no proceso de estabilización a veterinarios funcionarios. Preguntan cando vai ser a súa funcionarización, e así esquecerse da estabilización. Sen resposta
Concurso de escalas de consumo: son poucas persoas que se moven (3 ou 5). Non hai motivo para retrasar a resolución do concurso. Situación? -> DXEP: están vendo as solicitudes.
Cando van a tomar pose os laborais funcionarizados na convocatoria específica? -> DXEP: primeiro deberán rematar coa funcionarización para valorar os postos dispoñibles.
Oposicións de enxeñeiros de montes-A1 (libre+PI+estabilización), e enxeñeiros técnicos forestais (estabilización+PI): estes procesos foron convocados en decembro/21 (dous anos e medio), a relación de aprobados foi publicada no DOG o 8 de setembro de 2023. Non se sabe absolutamente nada da toma de posesión, mentres que outras especialidades que foron convocadas ao mesmo tempo, como enxeñería agronómica e enxeñería técnica agrícola. Por que non se da toma de posesión xa? -> DXEP: estánse valorando.
Roupa de traballo ao persoal substituto en educación: referimonos a persoal de limpeza, coidados, cociña, interpretes de linguaxe de signos, enfermería, etc. Non lla da a non ser que traballen máis de 6 meses, o que implica que teñan que comprala eles/elas. Isto é diferente a como se comporta Política Social que da a roupa ainda que só se traballe un día. Así que solicitamos a Educación que corrixa isto. -> DXEP ou Educación: sen resposta
Fides: documentación verificada que deixa de estalo. O Fides permite xerar o expediente persoal para ter unha copia con código de verificación asinada por Función Pública. Este informe só fai constar os méritos validados na data de xeración do documento. Sería importante que, dado que están facendo modificacións e sacándolle a validación a méritos que antes si estaban validados, etc., que se poida xerar un informe onde conste todo o expediente-e completo co estado de validación de cada mérito, para evitar ter que facer pantallazos etc. e poder ter unha copia exacta do que hai, non só da validación. -> DXEP: é a primeira vez que se usa o Fides, polo que se están dando erros que procuran solventar.
División do persoal do servizo de urbanismo da Consellería de Vivenda e Planificación de Infraestruturas: unha parte do persoal vai a xestión estricta de urbanismo e outro á costas. Sería posible saber como vai ser a asignación de persoal a cada unha das áreas? -> DXEP: sen resposta.
Acordo de condición de traballo do SPIF: cando teñen previsto asinar para poder aplicar todo o acordado. -> DXEP: sen resposta
RPT do Consorcio: cando se vai levar a mesa? -> DXEP: estamos en ello
Comisión de seguimento do acordo de centros de Política Social: presentada solicitude conxunta dos catro sindicatos, cando van convocar? -> DXEP: valorarán a súa convocatoria.
- Detalles
Na Comisión de Persoal que tivemos o venres 21 de xuño, quedaron aprobados os seguintes asuntos:
ORDE QUE MODIFICA O DECRETO 165/2019 (equivalencia categorías-escalas para a funcionarización)
Manteñen a rebaixa de grupo da categoría III-99 (coidador/a) que iría ao grupo C2 (escalas de auxiliares de clínica ou de auxiliares de coidadores). Non podemos aceptar un proceso no que o persoal laboral fixo do grupo III pase ao C2, cando lle correspondería o grupo C1 nunha escala de coidadores a crear. Reclamamos que mentres non se solucione a baixada de grupo, non se obrigue a funcionarizarse para manter a carreira profesional. CIG e CSIF votamos en contra da proposta. CCOO e UGT abstivéronse.
RPT DE FUNCIONARIZACIÓN A C1 E C2
A proposta está chea de erros. A DXEP anuncia a retirada do punto para a súa reformulación.
RPT DA ANTIGA CONSELLERÍA DE CULTURA
Eliminan tres postos de arquiveiro/a-A2 para crear outros tres de arquiviero/a-A1, o que permitirá dar toma de posesión ás persoas que superaron o proceso selectivo.
CIG, CSIF e UGT votamos a favor. CCOO vota en contra.
RPT DE ATRIGA
Consideramos insuficientes os tres postos creados en Vigo para desempeñar o traballo feito anteriormente polos traballadores e traballadoras que pertecían ao Órgano de Recadación de Vigo, xa que os números do volume de traballo en comparación con outras delegacións territoriais, indica unha clara necesidade de máis dotación de persoal para Vigo.
Non podemos aceptar a moficificación de acceso ao posto de xefatura de servizo de Concurso Específico a Libre Designación en base a “funcións Inspectoras” non acreditadas por parte de Atriga, e que non se contemplan tampouco nas funcións relacionadas nos distintos decretos de estrutura da Axencia.
CIG vota en contra. CCOO, CSIF e UGT votan a favor.
