Dentro da Administración moderna que pretende implantar Feijóo non cabe a participación da representación dos traballadores e traballadoras. Por non recoller, non recolle nin o dereito que recoñece a lei que crea a flexibilización por motivos familiares a ser ouvida a representación sindical, senón que o reduce a unha simple comunicación. Desde a CIG insistimos en participar en todos aquelas cuestións referentes á xornada laboral e horarios tal e como recoñece o EBEP.

Este texto é unha oportunidade de sentarnos a negociar e tratar de mellorar o dereito das traballadoras e traballadores públicos á conciliación da vida laboral, familiar e persoal. Porén, a negociación ten que partir de que o obxectivo é facilitar o exercicio deste dereito e que, mentres o traballo se faga, as decisións sobre o exercicio dos dereitos dos traballadores deben depender dos propios traballadores.

Principais alegacións da CIG-Autonómica á Orde de xornada laboral, flexibilización e teletraballo:

• Aplicación ao persoal non docente dos centros educativos.

• A compatibilidade ou non da flexibilidade co teletraballo debería valorarse en cada caso concreto e non limitarse con carácter xeral.

• O límite máximo permitido para completar a xornada deberá ser, en calquera caso, superior ás 18:30 sempre que o centro ou edificio administrativo permaneza aberto. As 18:30h debera ser un obxectivo de mínimos. Isto resulta máis grave na flexibilización por motivos familares xa que a lei de igualdade recoñece o dereito ao horario máis amplo posible. Para facer real o dereito á esta flexibilización, o responsable de cada centro ou edificio administrativo será encargado de facilitar os medios para dispoñer o acceso e saída, dentro do horario de referencia mínimo establecido.

• Unha flexibilización por interese particular con autorización previa só estaría xustificada cando implique partir a xornada ou ter un horario de presenza obrigada diferente ao habitual. Para a maioría dos casos, onde non se parta a xornada e o horario de presenza obrigada é suficientemente amplo, a flexibilización por interese particular debe ser automática, perdendo xa que logo o sentido a “compensación diaria”. Propoñemos que calquera tipo de flexibilización horaria, o cómputo de horas teña que ser cumprido en termos mensuais, tal e como opera na AXE, que por outra parte, resulta de máis fácil control para a Administración.

• Solicitamos que todas as autorizacións de flexibilidade e o teletraballo que precisen informe sexa tamén ouvida a representación sindical en función do dereito recoñecido no artigo 40 do EBEP.

• Calquera réxime de horario ou xornada de traballo distinto do xeral deberá estar contemplado necesariamente nas características do posto recollidas na correspondente Relación de Postos de Traballo e a súa imposición deberá ser negociada coa representación sindical das empregadas e empregados públicos. Por exemplo: fala esta orde de que os postos “de apoio, técnicos ou administrativos” cando resulte máis axeitado para o desenvolvemento das funcións asignadas en horario de 9.00 a 14.00 e de 16.00 a 18.30 horas.  Hai que ter en conta que son potencialmente a maior parte do persoal e estes criterios nin quedan definidos aquí nin se deriva á rpt, senón que quedaría a criterio discrecional da unidade. Tamén falta un desenvolvemento específico desta orde para o caso daqueles traballadores con horarios especiais distintos que non teñen un traballo de oficina.

• Igualar a duración da pausa regulamentaria do persoal funcionario coa establecida para o persoal laboral da Xunta de Galiza no V convenio colectivo (30 min) e para o persoal da Administración Xeral do Estado (30 min) na Resolución do 28 de decembro de 2012 (BOE 29/12/2012)

• Destacar que o control horario será tamén efectivo será aplicable a todos os empregados públicos, incluíndo as persoas titulares de subdirección xeral, xefaturas de servizo e xefaturas territoriais e todos aqueles suxeitos a dispoñibilidade horaria ou que realicen horas extras.

• Introdución das novas tecnoloxías na tramitación dos procedementos e redución dos prazos. Validez das comunicacións electrónicas na comunicación e xustfiicación de ausencias.

• Na xustificación de ausencias, non considerar como tales aquelas que se poidan compensar mensualmente.